Sang in die erediens

Abstract

Die bewering is al gemaak dat die ontstaansrede van die Gereformeerde Kerk in 1859 lê by die saak van Gesange — of die verpligting om dit te sing. So word dit meesal deur nie-Gereformeerdes gestel en oningeligte Gereformeerdes stem dan daarmee saam. Maar dit is onhistories en onwetenskaplik om daaraan vas te klou of nog steeds so te sê. Die saak van die Gesange was natuurlik ’n punt op die agenda, miskien selfs prakties ’n maklik-aanwysbare item, maar nie die enigste nie. Daaragter het ’n belangrike geheel van besware en gevoelighede oor afwyking in leer en verkeerde opset in kerkregering gelê. Dit is ook ’n geweldige verskraling om die Gereformeerde Kerk se bestaan aan nie-gesange-sing en aan reaksie-net-daarteen te verbind.